بعد ٦ شهور من الطلاق
لسه متصل بيا من شوية بيعزمني على فرحه؟!
إيه اللعبة القذرة اللي بيلعبها دي؟
الممرضة حست إن الجو مشحون، فاعتذرت بسرعة وخرجت وهي بتقول إنها هتبعت حد ينضف الإزاز.
الباب اتقفل.
والصمت رجع يخنق الأوضة من تاني.
بس المرة دي، الصمت كان تقيل تقيل أوي.
بصيت في عينه مباشرة، وقلت بهدوء مخيف
ممكن أفهم إيه التمثيلية دي؟
كريم قام وقف ببطء. مسح وشه بإيده، وتنهد تنهيدة طويلة، كأن جبل كان على صدره وانزاح، أو كأن سر تقيل خلاص اتكشف ومبقاش فيه مفر من المواجهة.
بصلي، وعينه كانت بتلمع بدموع محبوسة
مافيش فرح يا يارا.
ضحكت.
ضحكة قصيرة، مرة، كلها وجع وسخرية.
مافيش فرح؟! أومال المكالمة اللي من عشر دقايق دي كانت إيه؟ كنت بتتسلى؟ كنت بتشوف لسه بتوجع لما أسمع إنك هتتجوز غيري ولا لأ؟
كنت بحاول أستفزك!
صرخ بيها فجأة، بس وطى صوته بسرعة لما البنت اتحركت في حضني.
كمل بصوت مبحوح ومخنوق
ست شهور يا يارا! ست شهور بدور عليكي في كل حتة زي المجنون! غيرتي رقمك القديم، سبتي الشقة، سبتي شغلك، اختفيتي كأنك فص ملح وداب!
سكت ثانية، وبلع ريقه، وكمل وعينه متعلقة بيا
لما عرفت مكانك من يومين بالصدفة عن طريق دكتورة التحاليل، جيتلك وشفتك وإنتِ خارجة من العيادة ببطنك الكبيرة.
حسيت إن قلبي وقف لحظتها.
كمل بصوت واطي، كأنه بيكلم نفسه
كنت عايز أجري عليكي، آخدك في حضني، أصرخ في وشك وأسألك ليه خبيتي عني!
بس خفت
خفت من النظرة اللي شفتها في عينك النهارده.
خفت ترفضيني، أو تمنعيني أشوف ابني أو بنتي، أو تقولي إنك مش عايزاني في حياتك تاني.
عشان كده لما عرفت إنك دخلتي المستشفى النهارده الصبح عشان تولدي، جيت وفضلت مستني بره.
ولما الدكتور طلع وطمني عليكي وعلى البنت مكنتش عارف أدخل أقولك إيه.
فكرت في أغبى فكرة في الدنيا إني أستفزك، أخليكي تتعصبي وتتكلمي، يمكن الغيرة تخليكي تفتحي قلبك، أو حتى تتخانقي معايا المهم أسمع صوتك!
بس عمري عمري ما تخيلت إنك تقولي الجملة دي.
بصيتله وأنا حاسة إن دماغي بتلف.
كل كلمة بيقولها بتفتح جروح قديمة، وبتلخبط حساباتي.
بتدور عليا؟!
قلتله وأنا بحاول أتحكم في رعشة صوتي
كريم إنت نسيت مين اللي طلق مين؟
إنت نسيت يوم ما رميت عليا يمين الطلاق من غير حتى ما تديني فرصة أفهم؟
نسيت لما لميت هدومك ومشيت، وبعتلي ورقتي مع المحامي كأني حتة أثاث قديمة خلصت منها؟!
دلوقتي جاي تقولي كنت بدور عليكي؟! ليه؟ عشان ضميرك صحي فجأة؟ ولا عشان البنت؟
كريم غمض عينه بألم، وهز راسه بالنفي
إنتِ فاهمة كل حاجة غلط يا يارا والله فاهمة غلط!
غلط إيه؟! إيه اللي هفهمه غلط في واحد ساب مراته وهي في عز احتياجها ليه، من غير سبب، ومن غير كلمة وداع؟!
قرب خطوة من السرير، وبص في عيني بتركيز شديد، وقال جملة جمدت الدم في عروقي
أنا ما طلقتكيش عشان كرهتك يا يارا أنا طلقتك عشان أحميكي!
سكت.
بصيتله كأنه بيتكلم بلغة تانية.
تحميني؟! تحميني من إيه يا كريم؟ إحنا كنا عايشين في أمان! لا لينا أعداء ولا لينا مشاكل! إنت بتألف فيلم جديد عشان تبرر ندالتك؟!
لأ مش بألف!
قالها بحدة، وطلع موبايله من جيب الجاكيت.
فتح صورة، ومد إيده بالموبايل قدام عيني.
بصيت للشاشة
ومع كل ثانية بتمر، ملامح وشي كانت بتتغير، ولوني بيخطف، وإيدي اللي كانت حاضنة بنتي بدأت تترعش من الخوف.
الصورة كانت ليا
وأنا خارجة من بيت أهلي، قبل الطلاق بيومين.
وعلى صورتي كانت مرسومة دايرة حمرا كبيرة، وتحتها رسالة مكتوبة بخط أسود عريض
لو ما بعدتش عن الصفقة دي، وطلقتها واختفيت من الصورة اللي جاي هيكون في جنازتها مش في فرحكوا.
رفعت عيني من على الموبايل، وبصيت لكريم بصدمة مش قادرة أستوعبها.
إيه ده؟! مين دول؟!
كريم قفل الموبايل، وحطه في جيبه، وبص لبنته اللي كانت نايمة بسلام في حضني، وقال بصوت كله مرارة
دول الناس اللي كان لازم أختفي عشانهم، وأبعدك عني عشان ما يوصلكيش أذى
بس المشكلة يا يارا إنهم النهارده الصبح، عرفوا إنك كنتي حامل وعرفوا إنك ولدتي هنا!
في اللحظة دي بالظبط
نور الأوضة قطع فجأة.
والباب اللي كان مقفول
بدأ يتحرك ببطء، وأكرة الباب بتتفتح من بره!
الأوضة غرقت في ضلمة كحل.
مفيش غير ضوء خافت أزرق طالع من شاشة جهاز قياس النبض اللي جنبي، بيلقي ظلال مخيفة على الحيطة.
صوت صفارة الجهاز المنتظمة فجأة بقى سريع طوط طوط طوط
دقات قلبي هي اللي كانت بتعزف السيمفونية المرعبة دي.
أكرة الباب كانت بتلف ببطء مستفز، وصوت تزييق خفيف بيقطع السكون.
في لحظة، كريم ما فكرش.
الراجل اللي كان من ثواني واقف مكسور وبيترجاني أسمعه، اتحول لوحش تاني خالص.
بسرعة البرق، زق السرير بتاعي بالراحة عشان يبعده عن مرمى الباب، وحط جسمه كله كأنه درع بشري بيني وبين المدخل.
إيده راحت ناحية ضهره تحت الجاكيت، وسحب مسدس أسود صغير.
شهقت بخوف، وكتمت بوقي بإيدي الشمال اللي فيها الكانيولا، عشان صوتي ما يطلعش.
الباب اتفتح على الآخر.
ظل راجل ضخم وقف في العتبة، لابس بالطو أسود طويل، وماسك في إيده سلاح كاتم للصوت.
الراجل رفع سلاحه في الضلمة ناحية السرير.
بس قبل ما يضغط على الزناد
كريم كان أسرع.
طلقة واحدة خرجت من مسدس كريم، كسرت هدوء المستشفى كله، واستقرت في كتف الراجل الضخم.
الراجل صرخ صرخة مكتومة ووقع لورا في الطرقة، وسلاحه وقع من إيده.
بس الصوت ما خلصش.
صوت خطوات سريعة بتجري في الطرقة، وصريخ ممرضات، وأصوات أقدام تانية بتقرب ناحية الأوضة.
كريم لف ليا بسرعة، وشه كان عرقان وعينيه بتلمع في الضلمة زي عيون الصقر
يارا، مافيش وقت! لازم نخرج من هنا حالاً!
أخرج إزاي يا كريم؟! أنا لسه خارجة من أوضة العمليات! جرحي
ما استناش أكمل كلامي.
قرب مني، وفصل خراطيم المحاليل من الكانيولا بحركة سريعة.
وبحذر شديد، كأنه بيشيل حتة كريستال خايف تتكسر، مد إيديه الاتنين تحتي، ورفعني من على السرير وأنا لسه حاضنة بنتي.
الوجع كان فوق الوصف.
حسيت إن بطني بتتفتح من أول وجديد، ودموعي نزلت سخنة على خدي غصب عني، بس عضيت على شفايفي لحد ما جابت دم عشان ما أصرخش.
كريم بص في عيني وهو شايلني، وقال بصوت كله حنية ووجع
استحمليني يا حبيبتي والله ما هخليهم يلمسوا شعرة منك ولا من بنتنا.
كلمة يا حبيبتي اللي طلعها من قلبه بعد ست شهور جفاف، هزت كياني أكتر من صوت الرصاص.
ما خرجش من الباب الرئيسي للأوضة.
اتجه ناحية البلكونة الصغيرة اللي بتطل على الجنينة الخلفية للمستشفى، واللي كانت متصلة بسلم الطوارئ الحديدي.
فتح باب البلكونة الأزاز برجله، والهوا السقعة والمطر ضربوا وشنا.
نزل بيا على السلم الحديدي وهو شايلني بإيد، وماسك المسدس بالإيد التانية.
كل خطوة كان بينزلها، كنت بحس بقلبه بيدق في صدره بسرعة جنونية، وبحس بقوة دراعاته اللي محاوطاني ومحاوطة بنتي بأمان غريب أمان وحشني أوي.
وصلنا للجنينة الخلفية، وكانت الدنيا بتمطر بغزارة.
المطر غسل وشي، واختلط بدموعي.
كريم جري بيا ناحية عربية دفع رباعي سودة كانت راكنة في الضلمة ورا شجرة كبيرة، بعيد عن بوابة المستشفى.
فتح الباب الخلفي، ونزلني بالراحة على الكنبة اللي ورا، وغطاني بجاكيت بدلته المبلول عشان يحميني أنا والبنت من البرد.
وقبل