بعد ٦ شهور من الطلاق
بعد 6 شهور من الطلاق طليقي كلّمني يعزمني على فرحه. رديت عليه مبروك بس أنا لسه والدة ومش قادرة أقوم من السرير.
بعد ست شهور بالظبط من يوم ما اتطلقنا
كريم كلّمني لأول مرة.
كنت وقتها بالعافية قدرت أنيم البنت الصغيرة اللي بين إيديا.
الموبايل رن مرتين
ما رديتش.
مش عشان مش عايزة.
عشان أصلًا ماكنتش قادرة.
إيدي اليمين كانت نملت من كتر ما شايلة بنتي من ساعات بنفس الوضع.
والكانيولا لسه مركبة في إيدي الشمال، وأقل حركة كانت بتوجعني وجع يحرق.
مفعول البنج كان بيبدأ يروح.
وجرح العملية القيصرية تحت بطني كان بيدق مع كل نفس، كأنه بيفكرني إن من كام ساعة بس فتحوا بطني عشان يطلعوا أغلى حاجة في حياتي.
أوضة المستشفى كانت هادية بشكل يخوف.
مفيش غير صوت جهاز التكييف، ونفس بنتي الهادي.
كانت نايمة وبتحرك شفايفها كأنها بتدور على الرضاعة.
وبصراحة
في الحركة دي كانت شبه أبوها أوي.
الموبايل نور تاني.
كريم عبدالسلام.
عمري ما مسحت رقمه بعد الطلاق.
مش عشان لسه بحبه.
بس عشان حسيت إن مسحه هيبقى اعتراف إنه لسه فارق معايا.
زمان كان متسجل باسم حبيبي.
دلوقتي
اسمه الثلاثي وبس.
بارد.
رسمي.
زي علاقتنا.
ست شهور كاملة
ولا رسالة.
ولا مكالمة.
ولا حتى سؤال.
زي جوازنا بالظبط
خلص في هدوء، من غير خناقات، ومن غير حتى كلمة وداع محترمة.
دلوقتي بقى افتكر يتصل؟
رنّة الموبايل وقفت.
اتنفست الصعداء.
لكن أول ما حاولت أعدّل قعدتي من غير ما أصحي البيبي
رجع يرن تاني.
المرة دي بإصرار أكتر.
كأن لازم أرد.
بنتي اتخضت وتحركت.
هديتها بسرعة، وعضيت على سناني من الوجع، ومسكت الموبايل.
ألو
فضل ساكت كام ثانية.
وبعدين سمعت صوته.
نفس الصوت اللي كنت أعرفه.
قوي.
هادي.
وغريب عني في نفس الوقت.
يارا.
نطق اسمي.
لا يا حبيبتي.
ولا أي اسم كان بينا.
بس يارا.
وده الطبيعي
إحنا بقينا غرب.
أيوه.
قلت وأنا ببص من شباك الأوضة على السما المكشرة.
قال بمنتهى البرود
أنا فرحي كمان كام يوم
وهنا سكت لحظة.
هتيجي؟
فضلت باصة قدامي.
مش عشان ما فهمتش.
لأ
عشان عقلي رفض يستوعب.
طليقي
الراجل اللي حبّيته لحد ما نسيت نفسي.
اللي عمره ما إداني سبب حقيقي للطلاق.
اللي مضى الورق من غير حتى ما يبصلي.
بيتصل بعد نص سنة
يعزمني على فرحه!
هو بيستعرض؟
ولا عايز يتأكد إني عرفت إنه بدأ حياة جديدة؟
بنتي طلعت صوت صغير وهي لازقة في حضني.
دفاها الصغير طفى أي إحساس قديم كان ممكن يصحى جوايا.
ابتسمت ابتسامة خفيفة وقلت
ألف مبروك.
صوتي كان مرهق.
مبحوح.
صوت واحدة لسه والدة.
بس ثابت.
معلش مقدرش أجي.
أنا لسه في السرير ومش قادرة أقوم.
سكت شوية.
واضح إنه كان مستني رد فعل تاني.
يمكن دموع.
يمكن غيرة.
يمكن خناقة.
لكن يارا القديمة ماتت من زمان.
قال باستغراب
مالك؟
أول مرة أحس إن فيه أي إحساس في صوته.
مش خوف عليا.
قد ما هو استغراب.
بصيت لبنتي.
صغيرة
بريئة
وكلها بتاعتي.
افتكرت آخر شهر حمل.
رجلي اللي كانت منفخة.
ليالي الأرق.
كل كشف كنت بروحه لوحدي.
كرسي المرافق اللي كان دايمًا فاضي.
افتكرت أوضة العمليات.
النور الأبيض.
الخوف.
وصوت الأجهزة.
والوجع اللي قسم جسمي نصين.
وهو
ما يعرفش أي حاجة.
لأنه وقت ما اتطلقنا
كنت حامل بالفعل.
وقررت ماقولوش.
مكنتش عايزة يفتكر إني بحاول أربطه بالبيبي.
ولا عايزة بنتي تكبر وهي حاسة إنها حمل تقيل على حد.
لكن يمكن من التعب
أو من الوجع
الكلام خرج لوحده.
قلت بهدوء
أنا ولدت النهارده.
ولسه خارجة من العملية.
بعد ما قلتها
أنا نفسي اتصدمت.
ست شهور وأنا مخبية السر.
الحمل.
والتحاليل.
وتجهيز أوضة البيبي.
والدموع اللي كنت بمسحها لوحدي كل ليلة.
ما تخيلتش أبدًا إنه يعرف بالطريقة دي.
فضل ساكت.
سكوت طويل.
أنا أعرف كريم.
السكوت ده معناه إن بركان جوّاه بيغلي.
حضنت بنتي أكتر.
وفجأة
الباب اتفتح بعنف.
الهوا السقعة دخل الأوضة مرة واحدة.
رفعت عيني.
ولقيته واقف قدام الباب.
لابس بدلة سودة شيك.
والجاكيت عليه نقط مطر.
شعره مبهدل.
وشه أصفر.
وعينيه حمرا.
لكن ماكانش بيبصلي.
كان مركز على البنت اللي في حضني.
دخل بسرعة.
وفي ثواني كان واقف قصادي.
ريحة البرفان اللي كنت حافظاها اختلطت بريحة المطر
وريحة غضب.
قال بصوت مبحوح
يارا
إنتِ مخبية عني إيه؟
الكلمة دي رجعتلي كل حاجة.
الحمل لوحدي.
التعب لوحدي.
العملية لوحدي.
أول حضن لبنتي
لوحدي.
رفعت عيني وبصيتله بثبات.
كنت تعبانة.
وشاحبة.
وجرحي مولع.
بس ما بقيتش الست اللي كانت بتخاف من سكوته.
قلت بمنتهى البرود
وإنت مالك؟
اتغير وشه.
يعني إيه مالي؟
وفجأة صرخ
يا يارا البنت دي بنت مين؟
ومد إيده ناحية البيبي.
ما فكرتش.
حضنتها بسرعة وصرخت
إوعى تلمسها!
لفيت جسمي كله عليها.
رغم إن الحركة فتحت جرح العملية.
الوجع ضربني لدرجة إن الدنيا اسودت قدام عيني.
العرق نزل على ضهري.
بس ما سيبتهاش.
ومش هسيبها.
كريم وقف مكانه.
إيده في الهوا.
وبصلي.
شاف وشي من الوجع.
وشاف إيديا وهي بترتعش وهي حضناها.
وشاف حاجة أول مرة يشوفها في عيني.
كره.
في اللحظة دي
بنتي صحيت.
وعيطت بصوت عالي.
البطانية اتحركت شوية.
ووشها بان.
كريم نزل بعينه عليها.
بص لحواجبها
لأنفها
لشفايفها
وفجأة
وشه فقد كل لونه.
لأنه اكتشف إن البنت اللي كان لسه بيسأل دي بنت مين؟
كانت نسخة منه هو.
إيده نزلت ببطء شديد في الهوا.
كأن الجاذبية فجأة سحبت كل القوة اللي كانت في جسمه.
رجع خطوة لورا، وخبط في الترابيزة الصغيرة اللي جنب السرير.
كوباية المية وقعت واتكسرت على الأرض، وصوت الإزاز عمل صدى عالي في الأوضة الهادية.
لكن لا هو اتحرك، ولا أنا رمشت.
كانت عينه متسمرة على البنت.
بنتي بتعيط، ووشها محمر، وبتحرك إيديها الصغيرة بعصبية.
نفس التكشيرة اللي بتظهر بين حواجبه لما بيتعصب.
نفس شكل الدقن.
حتى طابع الحسن الصغير اللي في دقنها كان نسخته بالمللي.
كريم بلع ريقه بصعوبة، وصوته طلع همس مهزوز، مافيهوش أي أثر للغرور أو البرود اللي كان بيكلمني بيه من دقايق
دي دي بنتي؟
ما ردتش عليه.
كنت مشغولة بهدي بنتي، بهزها بالراحة وبحاول أتحمل السكاكين اللي بتقطع في بطني مع كل نفس.
لفيت وشي الناحية التانية، كأنه مش موجود في الأوضة أصلاً.
التجاهل كان أقوى من أي شتيمة أو صريخ.
لكن هو ما استسلمش.
قرب تاني، المرة دي ببطء شديد، كأنه خايف يقرب من قنبلة موقوتة.
نزل على ركبه جنب السرير، عشان يبقى في مستوى وشي.
بدلته الشيك اتبهدلت من الأرض ومن نقط المية والإزاز، بس ما اهتمش.
مد إيده المرتعشة ناحية طرف البطانية، وبصلي نظرة فيها رجا رجا عمري ما شفته في عينه طول سنين جوازنا.
ممكن ممكن ألمسها؟
بصيتله.
الراجل القوي، المسيطر، اللي كلمته ما بترجعش، قاعد على ركبه قدامي زي طفل تائه.
في اللحظة دي، عقلي اشتغل بسرعة غريبة.
هو إزاي وصل هنا بالسرعة دي؟
من دقايق كان بيكلمني في التليفون!
أكيد كان أصلاً في المستشفى، أو قريب منها، أو لأ، مستحيل تكون صدفة!
المطر اللي على هدومه، نفسه المقطوع، ده كأنه كان بيجري عشان يلحقني!
بس إزاي عرف مكاني؟
أنا غيرت شقتي، وغيرت المستشفى اللي كنت بتابع فيها من أول ما عرفت إني حامل!
عشان أهرب منه، ومن أهله، ومن أي حاجة تفكرني بيه.
قطع حبل أفكاري صوت خبط خفيف على الباب، ودخلت الممرضة ومعاها ملف التحاليل.
أول ما شافت الإزاز المكسور وكريم اللي قاعد على الأرض، وقفت مصدومة
خير يا مدام يارا؟ في حاجة؟ أستاذ كريم، حضرتك كويس؟
اتجمدت في مكاني.
الممرضة عارفة اسمه!
بصيت للممرضة، وبعدين بصيت لكريم اللي غمض عينه بضيق، كأنه كان بيتمنى الأرض تنشق وتبلعه قبل ما الممرضة تتكلم.
سألت بصوت واطي، بس كان مليان جليد
إنتِ تعرفيه منين؟
الممرضة اتلخبطت وبصت لكريم تستنجد بيه، ولما لقته ساكت، ردت بتوتر
يا فندم أستاذ كريم هو اللي حجز لحضرتك الجناح ده، وهو اللي دفع تكاليف العملية كلها من الصبح، وكان واقف بره قدام أوضة العمليات لحد ما حضرتك خرجتي بالسلامة بس هو اللي نبّه علينا مانقولش لحضرتك إنه هنا!
الكلام نزل على ودني زي الرصاص.
بصيت لكريم.
ما كنتش قادرة أستوعب.
إزاي؟
إزاي كان واقف بره، وهو