حكاية حلا كتابة حماده هيكل

القصة كاملة
انا حلا عندي ٢٧ سنه متجوزه 
بس في حاجه بتحصل ومش لازم تستمر
هحكي لكم حكايتي من تلات سنين كنت بشتغل في شركه كبيره ومكونتش مرتبطه بس كنت بحب مهند زميلي بحبه مع نفسي يعني معجبه بيه وباخلاقه وطريقته في التعامل بس عمري مقولت له ولا اظهرت له اي اهتمام قعدت احبه سنتين مع نفسي اوقات كنت بحس انه بيحبني وبيبادلني المشاعر والنظرات واوقات تانيه كنت بحس انه مش شايفني اصلا ولا حاسس بوجودي
ومرت الايام وفجاه مهند بطل يجي الشغل ولما سالت عليه قالو لي انه استقال وسافر يشتغل بره مصر حاولت كتير اشيله من دماغي وابعده عن تفكيري بس مقدرتش
كنت بقضي ليالي كتيره ببكي طول الليل وادعي ربنا انه يشيل حبه من قلبي او يجمعني بيه وكنت بحاول اعرف اي اخبار عنه بس برجع اقول لنفسي هسال عنه بصفتي مين
وفي الفتره دي اتقدم لي كريم صاحب اخويا فيه كل الصفات الي تتمناها اي بنت شهم ومهذب ووسيم ومجتهد وطموح فكرت ان دي الطريقه الوحيده الي تنسيني مهند وفعلا وافقت علي كريم واتخطبت له وبعد تلات شهور من الخطوبه وبدون اي مقدمات في يوم لقيت مهند عندنا في البيت جايب اهله وجايين يخطبوني يعني كان بيحبني فعلا وبيفكر فيا طيب مصارحنيش ليه كانت حاجات كتير اتغيرت بابا اعتذر لهم اني مخطوبه وكل شئ نصيب بابا مفكرش حتي يسالني اصل هيسالني في ايه مانا فعلا مخطوبه
يومها حسيت الدنيا

اسودت في وشي انا لسه بحبه بس انا مخطوبه ولقيتني فجاه كرهت كريم وكرهت وجوده في حياتي وبقيت اتعمد اضايقه وازعله واخلق خناقات مفتعله علشان يسيبني بس كان بيتمسك بيا اكتر ويقول لي انا عارف انك مش مبسوطه بس اوعدك لما نتجوز هخليكي اسعد واحده في الدنيا
استسلمت للقدر وبقيت شايفه كل حاجه في الدنيا شكل واحد ولون واحد مفيش حاجه فارقه معايا وحددو معاد فرحنا وقتها حسيت اني بغرق ومش عارفه اعوم ومحتاجه حد ينقذني وكنت ساكته افتكروني موافقه وفرحانه كرمه اخت كريم اتخطبت واتجوزت وسافرت وانا محضرتش فرحها ولا باركت لها ومهمنيش يزعلو مني او ميزعلوش بس كريم دافع عني وقال لهم اني تعبانه بصراحه خو كان يستاهل واحده احسن مني واحده تحبه بجد وتبادله المعامله الحلوه بالمثل 
عرفت من زمايلي ان مهند اتجوز واخد عروسته وسافر البلد الي بيشتغل فيها
انا شوفته في كل حالاته وهو زعلان وهو فرحان لكن مشوفتوش وهو عريس ومكونتش انا العروسه
اتجوزت انا وكريم وبصراحه كان نعم الزوج عمره ما زعلني حاولت احبه بس معرفتش
قلبي لسه مع مهند وقررت احب كريم بعقلي مش بقلبي وبعد فتره عرفت اني حامل وفي الشهر الرابع من الحمل الدكتور قال انه ولد قولت لكريم هسميه مهند ابتسم وقال لي اسم جميل نسميه مهند 
وعدت الايام وولدت مهند ويومها فكرت ان ده كان مفروض يكون ابن مهند مش كريم 
استغفرت ربنا وقررت اني احاول احب
جوزي زي ما هو بيحبني
عرفت ان كرمه اخت كريم راجعه من السفر هي وجوزها علشان يستقرو في مصر هم عندهم بنوته جميله شوفت صورتها من فتره 
كنا كلنا متجمعين في شقه حماتي وراح كريم يجيب اخته وجوزها من المطار ولقيته داخل شايل بنوته زي القمر وبيقول دي حلا عروسه مهند ابني تعالي شوف عروستك يا مهند ولقيت اخته داخله وراه ومعاها جوزها مهند
اول مشوفته اتصدمت وهو كمان كان باين عليه انه اتصدم وفجاه كل الاصوات اختفت من حواليا ومحسيتش بنفسي 
فوقت لقيت نفسي علي كنبه الانتريه وهم التلاته وافقين جنبي هو ده مش حلم هو ده فعلا مهند هو ايه الي بيحصل يعني من بين كل بنات الكون مش لاقي غير اخت جوزي تتجوزها يامهند وكمان مسمي بنتك علي اسمي 
الكل قلقانين عليا مالك ياحلا في ايه رديت وانا بحاول ابان طبيعيه معلش يا جماعه انا اسفه اني قلقتكم معايا تقريبا مكلتش من امبارح ونسيت افطر وفجاه حسيت بدوخه انا اسفه كمان مره ردت كرمه اخت اكرم الف سلامه عليكي 
الله يسلمك 
لكن حسيت بعدها اني مش مظبوطه وممكن اعيط في اي لحظه
انسحبت من وسطهم بهدوء ودخلت الحمام ووقفت قدام المرايا
معقول بعد السنين دي اشوفك تاني وفين هنا ومع مين
مع اخر واحده اتوقع انك تتجوزها ضاقت بيك الدنيا يا اخي انهرت في العياط وبعدها جوزي خبط
بيبي انتي كويسه
ها اه يا حبيبي ثواني وخارجه غسلت وشي بسرعه
ومسحت دموعي وطلعت وانا رافعه راسي وايدي ف ايد جوزي ماهو لازم يفهم انه خلاص مبقاش ليه مكان في قلبي
وانه كان ماضي وانتهى ولو في حاجه جوايا هدوس عليها عشان جوزي وابني وحياتي اللي مش هدمرها بشوية مشاعر هبله
قابلته بعدها في البلكونه كان خارج يشرب سيجاره 
ازيك
انا تمام حمدلله ع سلامتك اقصد سلامتكم 
الله يسلمك
جميله بنتك ربنا يخليها
يارب و مهند ابنك كمان ربنا يخليهولك
ميرسي لذوقك دا ابوه هو اللي اختار الاسم دا 
ابتسم وقال بس انا مسالتش مين سماه 
ارتبكت وقولت عموما مراتك طيبه وبنت حلال حافظ عليها وربنا يسعدكم 
وسبته ومشيت او هربت بس انا لازم انساه 
حتى لو هشوفوا كل شويه لازم احكم عقلي وانسى
وارضى بنصيبي وهو كمان لازم يرضى
مرت الايام وبدات اتعود علي الوضع الجديد مهو اصلا مكانش بيني وبين مهند حاجه علشان افتكرها الموضوع كله كان اعجاب متبادل ومحصلش نصيب 
وبصراحه كريم كان كويس معايا في كل حاجه 
انا خلاص اتعودت ومهند كمان اتعود اننا نتقابل في المناسبات العائليه 
وكل واحد فينا فضل بالنسبه للتاني ذكري واسم غالي اختار يسميه لابنه او بنته 
ومين عارف يمكن في يوم من الايام مهند الصغير وحلا الصغيره يكملو قصه الحب الي انتهت قبل متبدا وتبقي حلا عروسه مهند مين عارف ليه لا كل شئ ممكن 
تمت
Hamada M Nagi