موت امي حكايات زهره

دي كلها راضي هو اللي بيتحايل عليا عشان أروح أخدمها، وشايفاه الراجل الطيب السند اللي مبيحرمش بنت من أمها!
كنت باجي على جوزي وأحايله وأضغط عليه، ولما كانت تحصل المشاكل، أداري وأجمل في صورته قدام أهلي.. وأمي ماتت وهي فاكراه البطل الوحيد اللي وقف معاها، والوحيد اللي مكنش بيمنعني عنها!
راضي رفع عينه ليا وهو مسند على الأرض، دموعه أغرقت وشه، مسك الورقة والحلق ومد إيده بيهم ليا بقلة حيلة 
يا حنان... أمك ماتت وهي فاكراني الأصيل؟ ماتت وهي بتدعي لي وأنا حارمك منها في أخر أيام عمرها؟! أنا اسف يا حنان.. أنا اللي قفلت الباب وقعدت أتكبر وأقول كرامتي وبنتي وسيبتك تتوجعي.. وأنتِ... أنتِ كنتِ بتجمّلي في وشي قدامها؟!
أنا وقفت مكاني، رجليا مش شايلاني، دموعي اللي كانت جافة طول العزا نزلت زي المطر.. بس المرة دي مكنتش دموع حزن بس، كانت دموع قهر ووجع وشفقة.
راضي
جه عليا وهو بيعيط بحرقة ومش قادر يأخد نفسه
ابوس إيدك أسامحيني يا حنان.. حقك عليا، حق أمك في رقبتي ليوم الدين.. أنا مش هسامح نفسي، عمري ما هسامح نفسي على الكام يوم دول.. كانت فاكراني نعم الزوج، وأنا طلعت أقسى خلق الله!
محمد أخويا لما فهم الموضوع من كلام راضي ومن الورقة، بص لراضي وبصلي، وحط إيده على وشه ومسح دموعه بأسى وقال بصوت تقيل
يا راضي يا أخويا... أمي راحت للي أرحم مني ومنك، وكانت طالعة من الدنيا ونيتها صافية من ناحيتك، كانت شايفاك كبير في عينها.. ادعيلها بالرحمة، والورقة دي والرسالة دي إشارة من ربنا عشان تعرف إن الكلمة الطيبة والستر بيعيشوا بعد صاحبتهم.
سعاد أختي وقفت تنظر للأرض، وشها اتغير وأحمر من الخجل والكسوف، حسّت في اللحظة دي بضآلتها وصغر حجمها قدام الوفاء والستر اللي كان بيني وبين أمي وبين جوزي.. أختي اللي باعت أمها عشان راحتها، شافت قدامها درس في الأصل والستر عمرها ما هتنساه.
قربت من راضي بالبطيء،، راجل طول بعرض كسرته اللحظة دي وموت أمي ونيتها الطيبة ناحيته.
أخدت منه الكيس.. طلعت الحلق الذهب الصغير، وحطيته في جيب بنتي حنان.. وأخدت الصورة القديمة، حطيتها على صدري
وبستها.. وأخدت الورقة المكتوبة بخط أمي المتكسر، وقريت كلماتها تاني بقلبي مش بعيني.
بصيت لراضي وقلت له بصوت هادي ومجروح بس مفيش فيه غل
أمي ماتت وهي سامحاك ومطمنة، وماتت وهي شايفاك راجل أصيل.. وأنا مش هبطل الصورة اللي هي ماتت وهي شايفاها فيك يا راضي. قوم يا راضي.. قوم عشان خاطر اللي في الورقة.
مسك إيدي وقام بالعافية، كان حاسس إن جبل ثقيل انهد فوق كتافه، ندم الخمس أيام دول هيفضل معاه عمره كله، بس النية الطيبة والستر اللي زرعته في بيتي قدام أمي هو اللي نقذ بيتنا من الخراب، وهو اللي خلى راضي يتغير في ثانية واحدة من راجل قاسي وعنيد، لراجل يحطني ويحط بنتي جوه عينيه ويخاف علينا من الهوا الطاير.
أمي راحت.. بس سابت في الكيس الأسود المقفول درس للكل إن الستر والخير أثرهم مابيموتش، وإن اللحظة القاسية ممكن تبني بني آدم جديد لو حس بالندم الحقيقي.
أخدت بنتي، وأخدت جوزي المكسور من ندمه، ورجعنا بيتنا.. بيتنا اللي اتغسل بالدموع والرحمة، وبقت ورقة أمي وصورتنا القديمة محطوطين في صدر البيت، تفكرنا كل يوم إن الرحمة والأصل هما اللي بيبقوا، وإن الأمهات بدعواتهم ونياتهم البيضاء بيفضلوا يحمونا ويصلحوا حالنا
حتى بعد ما يفارقوا دنيانا.