عزمت خطيبة أختي

الجوازة القديمة وتطلع هي الدكتورة الخام!
رجعت البيت لقيت أحمد مستنيني، كان لابس وشياكته على الآخر، وقال لي ببرود
أنا رايح لنهى يا أمي، وهصالحها، وهنحدد ميعاد الخطوبة.. ياريت تراجعي نفسك وتجهزي اعتذارك.
قلت له بهدوء غريب
ماشي يا أحمد، بس قبل ما تنزل، خد كارت الفرح ده معاك، واسألها ليه العروسة اللي في الفيديو عندها نفس الحسنة اللي في إيد الدكتورة نهى؟ وليه ندى المضحية مظهرتش في أي صورة تانية غير في الكوشة؟
أحمد أخد الكارت وبص لي بشك، ونزل. غاب 3 ساعات، الساعات دي مرت عليا كأنها سنين.
سمعت صوت مفتاحه في الباب، دخل ورمى نفسه على الكنبة، وفضل ساكت.
بص لي وقال وصوته مخنوق
طلعت متجوزة يا أمي.. ندى دي أختها فعلاً، بس ندى هي اللي دكتورة ومسافرة بعثة بره من سنين، ونهى استغلت إن محدش بيشوف أختها واستخدمت اسمها وشهادتها وصورها عشان تعمل لنفسها برستيج قدامي.. وعلامة الخاتم كانت من جوازة قديمة لنهى نفسها، وفشلت بسبب كدبها برضو.
أحمد بص في الفراغ وقال
نهى مكنتش بتمثل الحب، كانت بتمثل حياة كاملة مش بتاعتها. الحمد لله إنك ركزتي في الحسنة وفي الخاتم.. لولاكي كنت اتجوزت واحدة أنا معرفش عنها حتى اسمها الحقيقي.
قربت منه وخدته في حضني، وعرفت إن عين الأم مابتخونش، وإن اللي بياكل بأيد غيره مبيشبعش، واللي بيبني بيته على كدبة بيصحى يلاقيه رمال.
بعدها بيومين نهى جتله وحاولت تكلم معاه بس هو رفض و طردها من غير تفكير
بعد ما أحمد قفل الباب في وش نهى، البيت سكن تماماً، بس السكون ده كان يخوّف. أحمد فضل ساند ضهره على الباب وهو بينهج، وكأنه كان في ماتش ملاكمة مش في عزومة غدا.
أنا كنت واقفة بعيد، مش عارفة أقرب منه ولا أسيبه في حاله. ملامحه كانت متغيرة، الغضب اللي كان مالي عينه اتحول لكسرة حقيقية. بص لي وقال بصوت مخنوق
كانت بتأكلني بإيدها يا أمي.. كانت بتمسح بوقي بالمنديل وكأني طفل، وهي من جواها كانت بتضحك عليا! كل حركة عملتها كانت مدروسة عشان تثبت لي إنها ست بيت ملهاش مثيل، عشان تغطي على الكذبة الكبيرة.
وهو بيتحرك عشان يدخل أوضته، كعب رجله خبط في حاجة تحت الترابيزة اللي جنب الباب. طلعت شنطة إيد صغيرة، نهى من ربكتها وهي خارجة بتجري نسيتها.
أحمد مسك الشنطة، وكان لسه هيرميها من الشباك وراها، بس فجأة الشنطة اتفتحت ووقع منها محفظة وصورة صغيرة.
أحمد وطى جاب الصورة.. وبمجرد ما شافها، لون وشه اتخطف تماماً. قربت منه عشان أشوف إيه اللي في الصورة، ولقيت صورة ل نهى وهي حضنة طفل صغير عنده حوالي 3 سنين.
أحمد ملامحه اتصلبت، ومسك موبايله واتصل بيها فوراً. مكنش بلوك بقى، المرة دي كان عايز يفهم المصيبة اللي لسه شاكك فيها.
أول ما ردت وهي بتعيط، صرخ فيها
نهى! مين الطفل اللي في الصورة اللي في شنطتك ده؟ إنتِ مش بس كنتِ متجوزة.. إنتِ عندك ابن ومخبية؟
سكتت لحظة، وبعدين صوت عياطها زاد وقالت
ده ياسين يا أحمد.. ابني. أنا مكنتش ناوية أخبي عليك العمر كله، بس كنت مستنية اللحظة اللي نتجوز فيها وتشوفه وتحبه، خفت لو قلت لك من الأول تفتكر إني عايزة أدبسك في طفل مش ابنك.
أحمد قفل السكة من غير ما يديها فرصة تكمل. بص لي وقال بمرارة
شفتي يا أمي؟ الكذبة بتولد كذبة تانية أكبر منها. هي مفكرتش فيا، هي فكرت في مصلحتها وبس. اللي تخبي وجود روح وجزء من لحمها ودمها عشان توقع راجل، دي متؤمنش على بيت ولا على عيال.
مسك الشنطة وطلع بره البيت، حطها قدام باب الشقة، ورجع قفل الترباس وراه بقوة، وكأنه بيقفل صفحة نهى من حياته للأبد.
عدى يومين، وأحمد مبيخرجش من أوضته غير للضرورة. كنت فاكرة إن الحكاية خلصت عند كده، لحد ما جرس الباب رن العصر. فتحت، ولقيت قدامي راجل وقور، شعره شايب، وباين عليه الهيبة، ومعاه نهى.. بس كانت مكسورة تماماً، ومخبية عينيها ورا نظارة سوداء.
الراجل اتكلم بهدوء
يا فندم، أنا الدكتور كمال، والد نهى. إحنا مش جايين نفرض نفسنا عليكم، بس بنتي هتموت من قهرتها، وفي كلمة حق لازم تتقال عشان نبري ذمتنا قدام ربنا.
أحمد خرج على الصوت، ووقف مبربع إيده بجمود. الدكتور كمال كمل كلامه وبص لأحمد
يا ابني، نهى غلطت لما خبت، وده ضعف بشري سببه الخوف من خسارة حد زيك. بس الصورة اللي شفتها في الشنطة.. الطفل ده مش ابن نهى.
أحمد ضحك بسخرية يا دكتور، دي صورتها وهي حضناه، والشبه بينهم ميتخفاش على حد!
الدكتور كمال طلع شهادة ميلاد وورقة وفات من جيبه وقدمهم لأحمد
ده ابن ندى أختها التوأم. ندى اتوفت من سنتين في حادثة، وسابت ياسين يتيم. نهى هي اللي مربياه من يوم ولادته، وهو مبيعرفش أم غيرها.
هي رفضت تقولك عشان مكنتش عارفة تفتح موضوع إنها أم بديلة لليتيم ده إزاي، وخافت تفتكر إن وجود طفل في حياتها هيكون عائق لجوازكم.
أحمد مسك الورق، وإيده بدأت ترتعش. بص ل نهى اللي شالت النظارة وبان ورم عينيها من العياط. نهى اتكلمت لأول مرة وصوتها طالع بالعافية
أنا كنت بآكل ابني في البيت قبل ما آجي عشان أفضالك وأركز معاك.. كنت بحاول أكون كاملة في عينك عشان متشوفش فيا غير الزوجة اللي تليق بيك. أنا خبيت حكاية الجواز والطفل عشان دي كانت حياة أختي اللي ماتت، وأنا ورثت مسؤوليتها ومكنتش عارفة أقولك إني أم لواحد مش ابني.
أحمد بص لي، وبص للورق، وبعدين بص ل نهى وقال لها كلمة واحدة هزت الصالة
يا نهى، أنا كنت مستعد أحب ابن أختك وأشيله فوق راسي لو كنتِ صدقتي معايا. بس إنتِ النهاردة أثبتي لي إنك دكتورة في التمثيل مش في الطب بس. حتى لو الحكاية فيها تضحية، الكدب في البدايات بيخلي النهايات دايماً مرة.
بص لوالدها وقال له
يا دكتور كمال، حضرتك على عيني وراسي، وبنتك بطلة إنها شايلة طفل يتيم.. بس أنا مش هقدر أئتمنها على بيتي وهي استكترت عليا الحقيقة في أهم يوم في حياتنا.
خرج الدكتور كمال وبنته، وأحمد قفل الباب المرة دي بهدوء مش بعنف. دخل المطبخ، طلع طبق أرز من اللي كان محطوط لنهى، وقعد ياكل ببرود غريب.
بص لي وقال
الأكل طعمه حلو قوي يا أمي.. فعلاً اللي باله مرتاح، بيعرف يبلع لقمته.
من يومها، وأحمد اتغير. مابقاش بيدور على الكمال ولا الشهادات، بقى بيدور على حد يكون كتاب مفتوح، حتى لو الكتاب ده فيه صفحات حزينة.